Letras Galegas 2025. Celebramos cantando na Praza do Conde Santo

 O pasado venres 16 celebramos  o Día das Letras Galegas. Para comezar esta xornada tan especial, toda a comunidade educativa reunímonos na praza da nosa vila. Alí, os alumnos de sexto de primaria tomaron a palabra e,  ofreceron un discurso explicando a importancia deste día para a nosa cultura e lingua. A continuación, a praza encheuse de voces, desde os máis pequenos ata os profesores, cantamos con alegría dúas emblemáticas cancións populares galegas: "Catro vellos mariñeiros" e "Na beira do mar". 

Despois do recreo, xuntámonos na biblioteca, alumnos e profes. Era o intre de aprender cousas novas. Da man do noso profe de música e coa axuda duns vídeos moi chulos producidos pola Real Academia Galega, mergullámonos no fascinante mundo da nosa cultura. Descubrimos e valoramos a enorme importancia que teñen na tradición galega a poesía oral e a música popular, con especial atención ás nosas incribles cantareiras. Foi unha maneira xenial de entender e apreciar ese legado tan rico que temos!

 Coñecimos as  Pandeireteiras de Mens, un grupo que fixo vibrar escenarios de medio mundo. Tamén nomearon ás irmás Adolfina e Rosa Casás, de Cerceda, que son a proba de que a tradición pasa de pais a fillos (ou de irmás a irmás!). E non podemos esquecer a Eva Castiñeira, de Muxía, outra voz poderosa desta festa.

Despois lembramos  unha actuación en Luar dos anos noventa:un grupo de persoas de San Adriano cantaban e bailaban música tradicional galega.  Si queredes podedes volver a ver o vídeo pinchando na foto,

Rematamos a xornada coa actuación de Carla, Iván, Irene, Ana Luísa e Nerea. Cantaron"A Ruada de Pigarzos", que nos encantou a todos!

Letras Galegas 2025: poesías e cantigas do mar.

 Durante esta semana na biblioteca, as profesoras Isabel, Mari Luz, Lucía e Chelo traballaron a poesía e a música  popular de tradición oral. Os alumnos crearon rimas sinxelas sobre animais mariños. Despois puxéronlles un pouco de música con palmas e pandeiretas, como facían as cantareiras galegas.

Letras Galegas 2025.NA BEIRA DO MAR. Cartel

Con Este cartel tan alegre convídamosvos  a celebrar o Día das Letras Galegas cun concerto na praza de Lourenzá. A nena que vemos tocando a pandeireta podería ser calquera das nenas da nosa vila, gozando da música popular da nosa terra. Coa súa pandeireta e o seu sorriso, lémbranos a alegría das nosas cantigas e a riqueza da nosa cultura galega.

Pero hai máis neste cartel. Vemos tamén unha pescantina, unha muller forte e traballadora que representa a todas esas mulleres galegas que, ao longo da historia, transmitiron de xeración en xeración as melodías que despois se converteron nas cancións que hoxe coñecemos. Mulleres coma elas, co seu canto e a súa paixón, mantiveron viva a nosa música e a nosa tradición oral.

Con este cartel queremos celebrar a alegría da nosa música e tamén render homenaxe a todas esas mulleres que foron as verdadeiras gardiás do noso patrimonio musical. Agardámosvos para cantar e celebrar xuntos!"